6-7 кылааска үөрэнэ сырыттахпына, ийэм кладовканы хомуна сылдьан ытарҕа, баттахха анньыллар шпилька булан ылбыта. Размердара кыра баҕайы этилэр. Мин ытарҕаны кэтэн көрбүтүм, ол эрэн, сотору соҕус, кулгааҕын үүтэ бааһыран баран бүөлэнэн хаалбыта. Баттахха анньыллар шпилька эмиэ кыра, арааһа 15 эҥин устуука баара, кичэллэн аҕай оҥоһуллубут этилэр. Ону ийэм, аньыырҕаан, миэстэтигэр ууран кэбиспитэ — элбэх баҕайы мас дьааһыктар саамай түгэхтэригэр баттатыллан сытар этилэр. Аны ол ытарҕа мин алдьаммыт заколкабыттан тигэн оҥоһуллубут этэ, заколка мин утуйар хоспор сыппыта ээ. Хайдах ылбыттарын саныы-саныы куһаҕан буолабын. Ол оннук ааспыта, оскуоланы бүтэриэхпэр дылы сыппыта. Онтон кэлин, биир сайын сүтэн хаалбыт этэ. Ийэм урут, мин кып-кыра эрдэхпинэ, эмиэ алдьаммыт заколкаттан оҥоһуллубут брошь булан ылбытын кэпсээбитэ. Ол иһин: “Уус тарбахтаах дьиэ иччилээхпит быһыылаах”, — диэччи. Ким эрэ дьээбэлээн оҥорбут диэҕи, иккиэн эрэ олорор этибит. Кэлин, ити дьиэни ремоннаары көтүрбүттэригэр, муоста анныттан били аатырар “чөчүөккэ уйатын” булбуттара. Чыычаах уйатыгар майгынныыр тогүрүк, барыта таҥас кырадаһына, туох эрэ түү курдук эҥин үһү.

Төрүт матырыйаал: Борук-сорук : Түбэлтэтэ кэпсэтиэх-2 : абааһы кинигэтэ : «КУО» сурунаалтан хомуурунньук / бэлэмнээтэ Елена Иванова. — Дьокуускай : Удьуор, 2016. — 274 с.