ХАТАС ЫАЛА
Орто дойду олоҕо, дьон дьоло ыалтан саҕаланар. Хас биирдии киһи олоҕор ыал буолуу дириҥ, быһаарар суолталаах. Былыр былыргаттан ыал буолбут киһи дьоллоох аатырар. Онон ыал – сырдыкка, кэрэҕэ, үтүөҕэ, дьолго-соргуга олох тускута буолар.
Хайҕаллаах Хатаспыт сиригэр тапталга олоҕурбут, бигэ тирэхтээх, чөл олохтоох, дьоһун-мааны ыал аҕыйаҕа суохтар. Кинилэр бары үлэни өрө туппут, өбүгэлэрбит үтүө үгэстэрин тутуһан, оҕолорун иитэллэр, нэһилиэк сайдыытыгар бэйэлэрин кылааттарын киллэрэллэр, эдэр ыччакка үтүө холобур буолаллар.
Бүгүн биһиги эһиги болҕомтоҕутугар Хатас ыалларын туһунан кэпсиир виртуальнай быыстапканы таһаарабыт. Быыстапка Россияҕа биллэриллибит дьиэ кэргэн сылыгар ананар.
Кинигэлэр бары биһиги библиотекабытыгар бааллар. Уларсан ааҕыҥ.
Кинигэни ааҕарга, уларсарга сүбэлэр
Бу кнопка көмөтүнэн кинигэни библиотекаттан сакаастыаххытын сөп.
Кинигэҕэ Үлэ Кыһыл Знамятын, Үлэ Албан аатын II, III степеннээх орденнар кавалердара, Хатас нэһилиэгин бочуоттаах олохтооҕо, үлэ бэтэрээнэ Жирков Иван Михайлович үлэҕэ анаммыт олоҕун суолун бэлиэ кэрдиис кэмнэрэ уонна кини дьиэ кэргэнин туһунан суруллунна.
Бу хомуурунньукка «Аҕа — биһиги киэн туттуубут!» диэн куораттааҕы иккис кэтэхтэн күрэх кыайыылаахтара киирдилэр. Кинилэр быыстарыгар Хатастан Георгий уонна Ольга Оконушкиннар, Михаил уонна Татьяна Окороковтар дьиэ кэргэннэрин туһунан суруллубут.
Кинигэҕэ Аҕа дойду улуу сэриитин кыттыылаахтарын уонна тыыл, үлэ бэтэрээннэрин дьиэ кэргэттэрин туһунан суруллубут. Кинилэр дьиэ кэргэннэрэ сэрии ыар кэмигэр уонна сэрии кэнниттэн тэриллибиттэрэ. Ыарахан кэми тулуйан, күүскэ үлэлээн, оҕолорун атахтарыгар туруорбуттара.
Бу кинигэҕэ Хатастан Клавдия Семеновна уонна Егор Филиппович Степановтар дьиэ кэргэттэрин туһунан ыстатыйа киирбит.
- Выставку подготовила:
- Никифорова Мария Сергеевна,
- главный библиотекарь